Audio-përgjimi, Basha: Kërkoj largimin e menjëhershëm të Fatmir Xhafaj

“Në emër të Partisë Demokratike, në emër opozitës, kërkoj largimin e menjëhershëm të Fatmir Xhafajt nga detyra e Ministrit të Brendshëm”.
Kështu tha kryetari i Partisë Demokratike, Lulzim Basha, duke deklaruar se shqiptarët kanë pritur prej një jave që Fatmir Xhafaj të jepte dorëheqjen si ministër i Brendshëm, ose të shkarkohej.
Në një dalje për mediat nga selia blu ditën e sotme, kreu i PD tha se prej një jave Fatmir Xhafaj hesht dhe i fshihet përgjegjësisë së tij ligjore dhe politike.
“Është fakt se Agron Xhafaj është kapur në një operacion ndërkombëtar kundër një organizate kriminale të trafikut të drogës i cili është zhvilluar nga Policia Italiane dhe DEA, agjencia amerikane e luftës kundër drogës. Është fakt se Agron Xhafaj është dënuar në Itali me vendim të formës së prerë të konfirmuar nga Gjyakata e Lartë e Italisë me 7 vjet e 2 muaj heqje lirie, për pjesëmarrje në një grup të strukturuar kriminal që kryente trafik ndërkombëtar të drogës”, u shpreh Basha.